Hindi bababa sa mahigit sa isang libong pasahero ang direktang naapektuhan ng Bagyong Ada sa iba’t ibang bahagi ng bansa.
Ito ay batay sa inilabas na ulat ng pamunuan ng Philippine Coast Guard .
Partikular na binanggit ng PCG na labing-anim (16) na pantalan sa iba’t ibang rehiyon ng Pilipinas ang apektado ng masamang panahon na dala ng bagyo.
Matapos na ipagbawal ang paglalayag, umabot sa 1,788 na pasahero, mga drayber ng truck, at mga cargo helper ang na-stranded sa mga pantalan.
Layon ng hakbang na ito na matiyak ang kaligtasan ng publiko.
Hindi lamang ito ang naging epekto ng bagyo, kundi naantala rin nito ang pagbiyahe ng 573 rolling cargoes, na naglalaman ng iba’t ibang produkto at kalakal, at 11 sasakyang pandagat na dapat sanang bumiyahe sa iba’t ibang destinasyon.
Bilang karagdagang pag-iingat, 11 barko ang pansamantalang naghanap ng masisilungan at naghintay na humupa ang bagyo bago ipagpatuloy ang kanilang mga biyahe.
Sa kasalukuyan, patuloy ang mahigpit na pagbabantay ng mga lokal na awtoridad at ng PCG sa lagay ng panahon at sa posibleng maging epekto nito sa mga operasyon sa mga pantalan at sa kaligtasan ng mga mamamayan.
Patuloy rin ang kanilang koordinasyon sa iba’t ibang ahensya ng gobyerno upang magbigay ng tulong at suporta sa mga apektadong indibidwal.
-----
Inanunsyo ng Department of Justice na aabot sa higit 300-milyon Piso ang kabuuan halaga sa nakolekta o naiturn-over ng ‘restitution money’ mula sa maanomalyang flood control projects.
Ayon mismo kay Justice Secretary Fredderick A. Vida, ang sumatotal ng tinatawag na ‘recovery of people’s money’ o pagsasaoli ng nakamal na pondo ng bayan ay nasa P316, 381, 500 na.
Alinsunod aniya raw ito sa kasunduan sa pagitan ng kagawaran at mga napiling ‘state witnesses’ para sa kasong may kinalaman sa flood control.
Ibinahagi pa ng naturang kalihim na ang mga nakolektang ‘restitution money’ ay galing sa mga isinaoling pera ng apat na testigo ng estado.
Ito’y sina former Public Works Usec. Roberto Bernardo, Henry Alcantara, Gerard Opulencia at contractor na si Sally Santos.
Subalit, binigyang linaw ni Justice Sec. Vida na ang konsepto para maituring bilang ‘state witness’ sa kaso ay hindi lamang nakabase sa isasaoling pera.
Aniya’y bahagi ang proseso ng ‘recovery of people’s money’ o mas kilala sa tawag na ‘restitution of money’ sa mga kondisyon inilalatag sa ilalim ng Witness Protection Program.
Giit kasi ng kalihim na hindi maaring matapos mangulimbat ng pera ang isang indibidwal at magsaoli nito ay awtomatikong ‘absuelto’ na kagad sa kaso.
Kinumpirma naman ng Department of Justice na nagsaoli ng halagang P35-million si former DPWH Usec. Roberto Bernardo.
Ayon kay Justice Usec. Felix Ty, galing aniya ito sa ibinentang ari-arian ng dating opisyal na siyang ‘downpayment’ lamang raw.
Inaasahan kasi na sa oras makuha ang balanse sa naibentang ari-arian ay makapagsasaoli ng nasa 150-milyon piso si Bernardo alinsunod sa kasunduan.