Muling sumuko si Sen. Jinggoy Estrada sa Criminal Investigation and Detection Group (CIDG) matapos maglabas ang Sandiganbayan ng ikalawang warrant of arrest laban sa kanya para sa kasong plunder na hindi maaaring piyansahan.
Ang warrant ay kaugnay ng umano’y P573-milyong flood control projects na may bahid ng umano’y kickback schemes.
Ito na ang ikalawang warrant na inilabas laban kay Estrada sa loob lamang ng apat na araw.
Nauna nang nagbayad siya ng piyansa para sa kasong graft, ngunit ang bagong kasong plunder ay hindi pinapayagan ng batas na piyansahan.
Sa kanyang pahayag, iginiit ni Estrada na hindi niya gagamitin ang Senado bilang panangga laban sa mga alegasyon.
Aniya, karapatan niyang maghain ng motion for reconsideration dahil kamakailan lamang niya natanggap ang Ombudsman Resolution.
***
Pormal nang inilunsad ang Bantay Senado, isang non-partisan citizens group ngayong Lunes, unang araw sa buwan ng Hunyo.
Ang naturang grupo ay magsisilbing ‘citizens monitoring group’ na layon bantayan at tutukan ang mga magiging kaganapan sa senado partikular sa pagdinig nito sa ‘impeachment’ kontra kay Vice President Sara Duterte.
Ang bagong ‘citizens monitoring group’ ay binubuo ng mga estudyante, young professionals, abogado, mga nasa akademiko, civil society organizations at iba pa
Paglilinaw ng grupo na ang hakbang ito ay hindi nagpapakita ng anuman posisyon patungkol sa pagiging inosente o may sala man ng ikalawang pangulo.
**
Itinanggi ng Armed Forces of the Philippines (AFP) ang mga ulat na nagsasagawa umano ng military drills ang China sa West Philippine Sea, partikular sa Bajo de Masinloc, at iginiit na gawa-gawa lamang ang naturang pahayag.
Ayon kay Retired Rear Admiral Roy Vincent Trinidad, special spokesperson ng AFP para sa West Philippine Sea, karaniwang taktika ng China ang maglabas ng propaganda tuwing may pagsasanay ang Pilipinas kasama ang mga kaalyado nito.
Giit niya, wala silang nakitang anumang organisadong galaw, tactical maneuvers, o joint formations ng mga barko ng People’s Liberation Army Navy at China Coast Guard na maituturing na military exercise, kundi hiwa-hiwalay lamang na presensya ng mga barko sa paligid ng Bajo de Masinloc.
Sa parehong panahon, matagumpay na isinagawa ng AFP, Philippine Coast Guard, at United States Indo-Pacific Command ang limang araw na Maritime Cooperative Activity mula Mayo 26 hanggang 30, 2026 sa parehong lugar.